с. Вольдино

Вöлi писькöс мортöн Уляшев

Me ачым чужлi Дереваннöйын, овлi Помöсдiнын, öнi ола карын. Ним-овöй Вячеслав Иванович Гуляев, чужан грездын медсясö тöдöны сиктса ног – Епов Миш Вань Ячеöн. Гижи эськö кывбур, но абу поэт да лыддя, мый тiян газетö лöсяласджык морт йывсьыс паськыдджык висьтöй. А сёрниöй – Вöльдiн сиктса морт Пётр Алексеевич Уляшев йылысь, кодi томсянь вöлi зэв писькöсöн, но олöмсö кадысь водз орöдiс война. Мыйлакö абу пасйöмаöсь республикаын петöм «Паметь книгаö». Гижöмаöсь дзик жö татшöм ним-вич-ова Вöльдiнса жö Уляшевöс, сöмын чужан кадыс оз лöсяв да радöвöй, призывайтчылöма 1942 воын карсянь. Педьö Öлексей Петьöыс жö вöлi лейтенант, вошлiс некодöн тöдтöг войналöн медводдза лунъясас на. Свердловскса военнöй училище помалöм бöрын буретш вöлöм мунö служитан местаас. И вошöма. Военнöй училищеас шыöдчöмсö сетлöма на 1936-öд воын. Сэсянь сэсся и босьтлöмаöсь фронт вылад. Гашкö, та вöсна и эз веськав книгаад. Миян, рöдвужлöн эм жö мыжным, эз ло водзвыв шыасьöма небöгсö вöчысь-лöсьöдысьяс дорö. Me эськö мöвпыштлi та йылысь, но чайтi, мый ас районсатö и сiдз оз вунöдны. А вот Михаил Константинович Игнатов «Взгляд сквозь годы» небöгас, аттьö, казьтыштöма сы йылысь 117-öд лист бокын. Но мыйлакö артмöма Д.П. Уляшев, абу П.А. Уляшев. И нöшта тайö книгаас жö эм снимок Помöсдiнса учительяслöн. Me сэнi на костын медся вылi радас, öчкиа. Снимайтчылiм 1966 воын, а эгö, кыдз пасйöма, 1963-öдын. Ог кöрит авторöс, шуласны тай, кодi оз уджав, сылöн öшыбкаыд оз ло. А мортыс книга вылад ок ёна уджалöма. Сэсся öд сылы кодкö висьталiс жö, эз сынöдсьыс босьт.

Пётр Алексеевичлöн батьыс действительнӧй армияын служитöма 12 во: 1908-1914 воясын – Кронштадтын, 1914 -1917 воясын – Галицияын, 1917-1920 воясын – гражданскöй война вылын. Сылöн портретыс öшалiс Кулöмдiнын Славалöн аллеяын. А пенсиясö аслыс и гöтырыслы урчитöма ачыс К.Е. Ворошилов. Вöльдiнсаяс, кöнкö, тöдöны на тайöс. Пётр Алексеевичлöн чойыс Александра Алексеевна вöлi менам гöтыр. Кувлi нин. Гижлiс сьыланкывъяс. Пожöгсаяс ёна на сьывлiсны. Меным лои окота да сьыланкыв вылö гижи жö кывбур. Но нотаяссö ог тöд да сьылансö лöсьöдны ог куж. Дереваннöйса В. Чувьюровкöд, воча воккöд, пыр кöсъя сёрнитлыны, да эг на аддзыв. Гашкö, отсыштас. Кывбурсö буретш бур мортлы, П.А. Уляшевлы, и сии.

В. ГУЛЯЕВ.

 

Парма гор, 2000, Июнь 22 лун.

 © Усть-Куломская межпоселенческая библиотека